कोल्हापूर : पश्चिम महाराष्ट्रातील राजकारणात सध्या एका नव्या चर्चेने जोर धरला आहे. जनसुराज्य शक्ती पक्षाचे युवा प्रदेशाध्यक्ष समित कदम यांची वाढती राजकीय सक्रियता आणि विविध पक्षांच्या नेत्यांशी असलेला संपर्क यामुळे राजकीय वर्तुळात अनेक प्रश्न उपस्थित होत आहेत. दुसरीकडे, चंदगडचे आमदार शिवाजी पाटील यांची याबाबत नाराजी असल्याची चर्चा देखील रंगू लागली आहे.

राजकीय वर्तुळात चर्चा अशी की, मुख्यमंत्री असोत, उच्च व तंत्रशिक्षण मंत्री चंद्रकांत पाटील असोत, जनसुराज्य शक्ती पक्षाचे नेते आमदार विनय कोरे असोत किंवा वैद्यकीय शिक्षण मंत्री हसन मुश्रीफ असोत, अनेक महत्त्वाच्या बैठका, कार्यक्रम आणि चर्चांमध्ये समित कदम यांची उपस्थिती सातत्याने दिसून येते. त्यामुळे “प्रत्येक महत्त्वाच्या राजकीय घडामोडीत समित कदमांची मध्यस्थी का?” हा प्रश्न अनेकांच्या चर्चेचा विषय ठरत आहे.

विशेषतः गोकुळ दूध संघाच्या घडामोडींमध्ये समित कदम यांची भूमिका चर्चेत आली. गोकुळच्या बैठका आणि संबंधित राजकीय हालचालींमध्ये त्यांचा थेट संबंध नसताना देखील ते समन्वयक म्हणून पुढे येत असल्याची चर्चा सुरू आहे. याच पार्श्वभूमीवर आमदार शिवाजी पाटील यांनी गोकुळच्या विषयावरून मंत्री हसन मुश्रीफ यांच्यावर टीकेची भूमिका घेतली होती.

मात्र, राजकीय सूत्रांच्या माहितीनुसार, या वादाची तीव्रता वाढू नये यासाठी समित कदम यांनी पडद्यामागे समन्वय साधण्याचा आणि दोन्ही बाजूंमध्ये संवाद घडवून आणण्याचा प्रयत्न केला. काहींच्या मते, याच भूमिकेमुळे आमदार शिवाजी पाटील नाराज असल्याची चर्चा राजकीय वर्तुळात रंगली आहे.

समित कदम हे केवळ पक्ष संघटनेपुरते मर्यादित न राहता कोल्हापूर आणि सांगली जिल्ह्यातील विविध सामाजिक, सहकारी आणि राजकीय प्रश्नांमध्ये सक्रिय भूमिका बजावताना दिसतात. युवकांमध्ये त्यांची वाढती लोकप्रियता आणि विविध स्तरांवरील संपर्कक्षमता यामुळे त्यांचा प्रभाव वाढत असल्याचे राजकीय निरीक्षकांचे मत आहे.

दुसरीकडे, स्पष्टवक्तेपणा आणि आक्रमक राजकीय भूमिकेसाठी ओळख असलेले आमदार शिवाजी पाटील हे कोणत्याही विषयावर थेट भूमिका घेणारे नेते म्हणून ओळखले जातात. त्यामुळे समित कदम यांच्या वाढत्या प्रभावाबाबत त्यांच्या मनात नाराजी असल्याच्या चर्चांना अधिक बळ मिळत आहे.

• या सर्व चर्चांमध्ये कोणत्याही नेत्याने अधिकृत भूमिका जाहीर केलेली नसली, तरी “हे पाटील आणि ते पाटील” हा विषय सध्या कोल्हापूर-सांगलीच्या राजकीय वर्तुळात चर्चेचा केंद्रबिंदू ठरला आहे. आगामी स्थानिक स्वराज्य संस्था निवडणुका आणि सहकारी क्षेत्रातील राजकारणाच्या पार्श्वभूमीवर या घडामोडींना विशेष महत्त्व प्राप्त झाले आहे.

सातारा | प्रतिनिधी

सांगली-सातारा विधानपरिषद निवडणुकीची रणधुमाळी सुरू असतानाच महायुतीतील अंतर्गत नाराजी उघडपणे समोर येऊ लागली आहे. भाजपकडून धैर्यशील कदम यांना उमेदवारी जाहीर होताच खटाव-मानचे नेते शेखर गोरे यांनी सोशल मीडियावर व्यक्त केलेली खंत आता जिल्ह्याच्या राजकारणात चर्चेचा केंद्रबिंदू ठरली आहे.

“साहेब, मी नक्की कुठे चुकलो?” या एका भावनिक प्रश्नाने राजकीय वर्तुळात खळबळ उडाली आहे. गेल्या विधानसभा निवडणुकीत भाऊ आणि मंत्री जयकुमार गोरे यांच्या शब्दावर विश्वास ठेवत स्वतःच्या राजकीय आकांक्षा बाजूला सारणाऱ्या शेखर गोरे यांना आता विधानपरिषद उमेदवारीची संधी हुकल्याची भावना असल्याची चर्चा रंगली आहे.

गोरे कुटुंबाचे मान-खटाव तालुक्यातील राजकारणावर अनेक वर्षांपासून वर्चस्व राहिले आहे. मात्र काळानुसार दोन्ही भावांमधील राजकीय मतभेद अधूनमधून समोर येत राहिले. आता पुन्हा एकदा त्याच मतभेदांची कुजबुज सुरू झाली असून, कार्यकर्त्यांमध्येही नाराजीचे सूर ऐकू येत आहेत.

दरम्यान, “मी शांत आहे पण संत नाही” या संदेशामुळे शेखर गोरे यांनी अप्रत्यक्ष इशारा दिल्याचे बोलले जात आहे. त्यामुळे आगामी स्थानिक स्वराज्य संस्था आणि इतर निवडणुकांमध्ये या नाराजीचे परिणाम दिसणार का, याकडे राजकीय जाणकारांचे लक्ष लागले आहे.

राजकीय वर्तुळात आणखी एक चर्चा जोर धरत आहे. उदयनराजे भोसले आणि शिवेंद्रसिंहराजे भोसले यांच्याशी असलेल्या जवळिकीमुळे शेखर गोरे यांचे राजकीय वजन वाढले असल्याचे मानले जाते. अशा परिस्थितीत त्यांच्या नाराजीमुळे सातारा जिल्ह्यातील समीकरणांवर परिणाम होण्याची शक्यता नाकारता येत नाही.

सध्या एकच प्रश्न विचारला जात आहे—

“जयकुमार गोरेंच्या राजकीय उदयात सख्ख्या भावाचाच बळी गेला का?”

या प्रश्नाचे उत्तर आगामी राजकीय घडामोडींमध्ये मिळणार असले तरी, गोरे बंधूंच्या नात्यातील दुरावा आणि विधानपरिषद उमेदवारीचा वाद हा सध्या सातारा जिल्ह्याच्या राजकारणातील सर्वात चर्चेचा विषय ठरला आहे.

— घडामोडी 24×7 Live

गोपाळगड किल्ला आणि मालकी वाद

गोपाळगड किल्ला हा कोणाच्या वैयक्तिक मालकीचा नसून सातबाऱ्यावर स्पष्टपणे “महाराष्ट्र शासन गोपाळगड किल्ला” असा उल्लेख आहे. मात्र, रत्नागिरी जिल्ह्यातील अंजनवेल गाव येथील श्री. युनूस हुसैन मणियार यांचा किल्ल्याशी कोणताही संबंध नसतानाही त्यांच्या कुटुंबाने गेल्या अनेक वर्षांपासून किल्ल्यावर कब्जा केल्याचा गंभीर आरोप करण्यात आला आहे.

माहितीनुसार, १९६० साली भ्रष्टाचारातून गुहागर तहसीलदार कार्यालयामार्फत खोटे कागदपत्र तयार करण्यात आले. केवळ ₹३०० मध्ये किल्ल्याच्या जागेचा लिलाव दाखवून श्री. युनूस हुसैन मणियार यांच्या वडिलांनी किल्ला विकत घेतल्याचे दस्तऐवज तयार करण्यात आल्याचा दावा करण्यात आला आहे. त्यानंतर आजपर्यंत या कुटुंबाने किल्ल्यावर बेकायदेशीर कब्जा ठेवला असल्याचा आरोप आहे.

किल्ल्याच्या परिसरात तब्बल ३१८ आंब्याची कलमे लावून दरवर्षी लाखो रुपयांचे उत्पन्न घेतले जात असल्याचेही सांगितले जात आहे. तसेच किल्ल्याची तटबंदी तोडून त्यातील दगडांचा वापर खंदक बुजवण्यासाठी करण्यात आला असून अनेक ऐतिहासिक वास्तूंचे नुकसान झाल्याचा आरोप आहे. किल्ल्याच्या आत वाहनांसाठी रस्ता तयार करण्यात आल्यामुळेही किल्ल्याच्या मूळ रचनेला धक्का बसल्याचे स्थानिकांचे म्हणणे आहे.

यासोबतच गुहागर तहसीलदार कार्यालय आणि गुहागर पोलिस स्टेशन यांनी संबंधितांना हाताशी धरल्याचा आरोप करण्यात आला आहे. आर्थिक देवाणघेवाणीमुळे कोणतीही कारवाई होत नसल्याचा दावा देखील करण्यात आला आहे.

महाराष्ट्र शासनाने या प्रकरणाकडे दुर्लक्ष केल्याचा आरोप करत स्थानिक लोकप्रतिनिधींचा या विषयाला पाठिंबा असल्याचेही बोलले जात आहे. दरम्यान, सोशल मीडियावर व्हायरल होत असलेल्या गोपाळगड व्हिडिओमध्ये दिसणारी व्यक्ती ही श्री. युनूस हुसैन मणियार यांचा सुपुत्र असल्याचा दावा करण्यात आला आहे.

या संपूर्ण प्रकरणाची चौकशी करून श्री. युनूस हुसैन मणियार यांच्यावर किल्ल्याचे नुकसान, बेकायदेशीर कब्जा आणि ऐतिहासिक वारशाची हानी केल्याप्रकरणी महाराष्ट्र पुरातत्व विभाग आणि केंद्रीय पुरातत्व विभागामार्फत फौजदारी गुन्हे दाखल करून तात्काळ अटक करावी, अशी मागणी करण्यात आली आहे.

गिरीमित्र प्रतिष्ठान, स्थानिक गिर्यारोहक अक्षय पवार, गुहागरचे पत्रकार, किल्लेप्रेमी, अंजनवेल गावचे रहिवासी आणि काही राजकीय पक्षांच्या प्रतिनिधींच्या प्रयत्नांमुळे अखेर सातबाऱ्यावर “महाराष्ट्र शासन गोपाळगड किल्ला” असा उल्लेख झाल्याचे सांगितले जात आहे.

– मंगेश बाळू कोयंडे
गिर्यारोहक – शिवप्रेमी – निसर्गप्रेमी
अध्यक्ष – गिरीमित्र प्रतिष्ठान