पक्षाला निधी न दिल्यास मंत्री, आमदारांचा घेणार राजीनामा पार्थ पवार यांचा इशारा; राष्ट्रवादीत नाराजी
मुंबई :
पक्षाला निधी द्या; अन्यथा राजीनामा घेऊ, अशा कडक शब्दांत खासदार पार्थ पवार यांनी राष्ट्रवादी काँग्रेसच्या मंत्र्यांसह आमदारांनाही इशारा दिला असल्याचे समजते.
केंद्रीय निवडणूक आयोगाला दिलेल्या पत्रात प्रदेशाध्यक्ष खासदार सुनील तटकरे आणि प्रफुल्ल पटेल यांच्या पदाचा उल्लेख न केल्यावरून आधीच पक्षात नाराजी असताना आता निधीसाठी मंत्री आणि आमदारांना इशारा दिल्यामुळे या नाराजीत आणखी भर पडली आहे.
महायुतीमधील घटकपक्ष असलेल्या राष्ट्रवादी काँग्रेस पक्षाने मागील विधानसभा निवडणुकीवेळी ५३ जागा लढविल्या होत्या. त्यापैकी तब्बल ४१ उमेदवारांचा विजय झाला. तर, रायगड लोकसभा मतदारसंघातून या पक्षाचे सुनील तटकरे हे एकमेव
उमेदवार विजयी झाले होते. त्या पक्षाला केंद्रीय मंत्रिमंडळात स्थान मिळाले नाही. मात्र, राज्य मंत्रिमंडळात या पक्षाचे एकूण ९ मंत्री आहेत. या सर्वांकडून पक्षवाढीसाठी आणि पक्ष चालवण्यासाठी पार्थ पवार यांनी ठरावीक निधीचे टार्गेट दिले आहे.
विशेष म्हणजे, आमदारांना आतापर्यंत अर्थमंत्री म्हणून अजित पवार यांनी दिलेल्या फंडापैकी ठरावीक रक्कम पक्षाला देण्याच्या सूचना देण्यात आल्याचे बोलले जात आहे.
राष्ट्रवादी काँग्रेसने पक्षाच्या अधिकृत आर्थिक व्यवहारांच्या अधिकारांमध्ये नुकताच मोठा बदल केला आहे. यापूर्वी राष्ट्रीय अध्यक्ष म्हणून अजित पवार, राष्ट्रीय महासचिव व कार्यकारी अध्यक्ष म्हणून प्रफुल्ल पटेल आणि खजिनदार वाय. पी. त्रिवेदी यांच्याकडे आर्थिक व्यवहारांचे अधिकार होते.