काल सांगलीत “मुळशी पॅटर्न” आज मिरजेत “गँग्स ऑफ वासेपूर”

आमच्या सर्व बातम्या मिळविण्यासाठी फॉलो करा : फेसबुक | ट्विटर |शेअरचॅट | इंस्टाग्राम

मिरज : (दि. 12 नोव्हेंबर)
मिरज शहर पुन्हा एकदा गुन्हेगारी हादऱ्याने हादरले आहे. निखील कलगुटगी खून प्रकरणातील मुख्य सूत्रधार सलीम पठाण याच्यावर बुधवारी दुपारी मिरजेतील सिव्हिल हॉस्पिटल परिसरात हल्ल्याचा प्रयत्न करण्यात आला. मात्र पोलिसांच्या सतर्कतेमुळे हा हल्ला फसला आणि पठाण थोडक्यात बचावला. या घटनेनंतर मिरज शहरात पुन्हा तणावाचे वातावरण निर्माण झाले आहे.

 घटनेचा संपूर्ण तपशील

निखील कलगुटगी यांच्या खुनानंतर सलीम पठाण व अन्य आरोपींना पोलिसांनी काही महिन्यांपूर्वी अटक केली होती. या प्रकरणात एकूण १३ जणांना अटक झाली असून सर्व आरोपी न्यायालयीन कोठडीत आहेत. बुधवारी सलीम पठाणला वैद्यकीय तपासणीसाठी मिरजेच्या सिव्हिल हॉस्पिटलमध्ये आणण्यात आले होते.

याच वेळी हल्लेखोरांनी हल्ल्याची योजना आखली होती. तिघे जण हॉस्पिटल परिसरात दबा धरून बसले होते. पोलिसांनी परिस्थिती ओळखताच संशयितांवर झडप घातली. या कारवाईत एक आरोपीला घटनास्थळावरून ताब्यात घेण्यात आले असून दोन जण फरार झाले आहेत. पोलिसांनी घटनास्थळावरून पिस्तूल व कोयते जप्त केले आहेत.

 पूर्व वैमनस्यातून कट रचला

प्राथमिक तपासानुसार, कलगुटगी खून प्रकरणामुळे आरोपींच्या गटात जुने वैमनस्य होते. या वैमनस्यातूनच सलीम पठाण याच्यावर सूडबुद्धीने हल्ला करण्याचा प्रयत्न झाल्याचा पोलिसांचा प्राथमिक अंदाज आहे.

 पोलिसांची चौकशी व पुढील तपास

महात्मा गांधी चौक पोलिसांनी अटक केलेल्या आरोपीकडून कसून चौकशी सुरू केली आहे. त्याच्याकडून हल्ल्याचा कट कोणी रचला, हत्यारं कुठून आणली आणि इतर फरार साथीदार कोण आहेत, याबाबत शोध घेतला जात आहे.

दरम्यान, घटनास्थळावरून पसार झालेल्या दोघांचा शोध घेण्यासाठी मिरज पोलीस आणि स्थानिक गुन्हे शाखा संयुक्त कारवाई करत आहेत.

 शहरात तणावपूर्ण शांतता

या घटनेमुळे मिरज शहरात तणाव निर्माण झाला आहे. पोलिसांनी खबरदारीचा उपाय म्हणून हॉस्पिटल परिसर व संवेदनशील भागांमध्ये पोलीस बंदोबस्त वाढवला आहे. नागरिकांना अफवा न पसरवण्याचे आवाहन करण्यात आले आहे.