मुंबई | प्रतिनिधी
मुंबईत ऑनलाइन फसवणुकीची एक धक्कादायक घटना समोर आली असून Bombay High Court मधील एका विद्यमान न्यायाधीशांची ₹6.02 लाखांची क्रेडिट कार्ड फसवणूक झाल्याची तक्रार नोंदवण्यात आली आहे. या प्रकरणी Cuffe Parade Police Station येथे गुन्हा दाखल करण्यात आला आहे.
पोलीसांनी दिलेल्या माहितीनुसार, 28 फेब्रुवारी रोजी न्यायाधीश HDFC बँकेच्या क्रेडिट कार्डवरील रिवॉर्ड पॉइंट्स रिडीम करण्याचा प्रयत्न करत होते. त्यासाठी त्यांनी इंटरनेटवर बँकेचा कस्टमर केअर नंबर शोधला. सर्चमध्ये दिसलेल्या एका हेल्पलाईन नंबरवर त्यांनी कॉल केला आणि तो अधिकृत असल्याचा त्यांना विश्वास वाटला.
फोनवरील व्यक्तीने स्वतःला बँकेच्या क्रेडिट कार्ड विभागाचा प्रतिनिधी असल्याचे सांगत रिवॉर्ड पॉइंट्स रिडीम करण्यास मदत करण्याचे आश्वासन दिले. त्यानंतर त्या व्यक्तीने WhatsApp द्वारे एक लिंक पाठवून अॅप डाउनलोड करण्यास सांगितले आणि प्रक्रिया पूर्ण करण्यासाठी क्रेडिट कार्डची माहिती भरण्यास सांगितले.
सदर फाइल iPhone वर उघडली नाही, त्यामुळे न्यायाधीशांनी घरातील दुसऱ्या स्मार्टफोनवर अॅप इंस्टॉल करून कार्डची माहिती भरली. त्यानंतर लगेचच त्यांच्या ई-मेलवर क्रेडिट कार्डवरून अनेक व्यवहार झाल्याचे संदेश आले. तेव्हा त्यांना फसवणूक झाल्याची जाणीव झाली.
तक्रारीनुसार, चार वेगवेगळ्या व्यवहारांद्वारे एकूण ₹6,02,566 रुपये डेबिट करण्यात आले. त्यानंतर न्यायाधीशांनी तात्काळ बँकेच्या अधिकृत कस्टमर केअरशी संपर्क साधून क्रेडिट कार्ड ब्लॉक केले. तसेच राष्ट्रीय सायबर क्राईम हेल्पलाईनवर तक्रार नोंदवून स्थानिक पोलीस ठाण्यातही तक्रार दाखल केली.
या प्रकरणी अज्ञात व्यक्तींविरोधात Information Technology Act च्या कलम 66, 66C, 66D तसेच Bharatiya Nyaya Sanhita च्या कलम 3(5), 318(4) आणि 319(2) अंतर्गत गुन्हा दाखल करण्यात आला असून पोलीस पुढील तपास करत आहेत.