सांगली : प्रतिनिधी
सांगलीच्या राजकारणात सध्या सर्वाधिक चर्चा होत आहे ती म्हणजे खासदार विशाल पाटील आणि त्यांचे माजी विश्वासू सहकारी मनोज सरगर यांच्यात सुरू झालेला थेट राजकीय संघर्ष. सांगली महानगरपालिकेच्या प्रभाग क्रमांक ११ मध्ये मनोज सरगर यांनी भाजपमध्ये प्रवेश केल्यानंतर ही लढत वैयक्तिक, राजकीय आणि प्रतिष्ठेची बनली आहे.
एकाच काळात एकाच राजकीय विचारधारेत काम करणारे हे दोन चेहरे आता पूर्णपणे विरुद्ध टोकांना उभे ठाकले असून, हा संघर्ष केवळ प्रभागापुरता न राहता संपूर्ण सांगलीच्या राजकारणावर परिणाम करणारा ठरत आहे.
विशाल पाटील : सांगलीतील प्रभावी नेतृत्व
खासदार विशाल पाटील हे सांगलीतील प्रभावी आणि जनाधार असलेले नेतृत्व मानले जाते. वसंतदादा पाटील यांच्या विचारांची परंपरा पुढे नेणारे नेतृत्व म्हणून त्यांची ओळख आहे. स्थानिक स्वराज्य संस्थांमध्ये त्यांचा प्रभाव असून, प्रभाग ११ हा त्यांच्या राजकीय प्रभावाखालील महत्त्वाचा भाग मानला जात होता.
मनोज सरगर : निष्ठावंत सहकाऱ्यापासून थेट विरोधक
मनोज सरगर हे दीर्घकाळ विशाल पाटील यांचे निकटवर्तीय व विश्वासू सहकारी म्हणून ओळखले जात होते. मात्र, भाजपमध्ये प्रवेश केल्यानंतर त्यांनी थेट आक्रमक भूमिका घेतली आहे. विशेष म्हणजे मनोज सरगर यांनी केवळ पक्षांतर केले नाही, तर संपूर्ण पॅनल भाजपमध्ये आणत विशाल पाटील यांच्या नेतृत्वालाच थेट आव्हान दिले आहे.नगरसेवक मनोज सरगर यांच्यासोबत नगरसेविका शुभांगी साळुंखे आणि मा महापौर कांचन कांबळे यांचाही भाजपमध्ये प्रवेश झाल्याने हा संघर्ष अधिक तीव्र झाला आहे.
प्रभाग ११ : संघर्षाचे केंद्रबिंदू
एकेकाळी काँग्रेसचा सुरक्षित गड मानला जाणारा प्रभाग ११ आता विशाल पाटील vs मनोज सरगर या थेट लढतीचे केंद्र बनला आहे. भाजपने मनोज सरगर यांच्या माध्यमातून संघटन मजबूत केले असून, काँग्रेसच्या पारंपरिक मतदारांमध्येही संभ्रम निर्माण झाल्याचे चित्र आहे.
राजकीय प्रतिष्ठेची लढाई
राजकीय जाणकारांच्या मते, हा संघर्ष केवळ पक्षांतरापुरता मर्यादित नाही. हा नेतृत्व, वर्चस्व आणि विश्वासघाताच्या आरोपांचा सामना आहे. मनोज सरगर यांचा भाजपमधील वाढता प्रभाव आणि विशाल पाटील यांची सांगलीतील पकड — या दोन शक्तींमधील संघर्ष आगामी महापालिका निवडणुकीत निर्णायक ठरणार आहे.
निवडणुकीत ‘हाय व्होल्टेज’ सामना अटळ
आगामी सांगली महापालिका निवडणुकीत विशाल पाटील यांचे पुतणे हर्षवर्धन पाटील विरुद्ध मनोज सरगर अशी थेट आणि अटीतटीची लढत अटळ मानली जात आहे. वसंतदादांच्या सांगलीत पेटलेला हा संघर्ष कोणाच्या बाजूने झुकतो, याकडे संपूर्ण जिल्ह्याचे लक्ष लागले आहे.
—